– Eg mottek meir drapstrugsmål frå Vest-Europa, inkludert Noreg, enn frå den tradisjonelt muslimske verda, fortalde ho på Nordiske Mediedagar i Bergen i dag.

– Eg får trugsmål frå heile Skandinavia. I det siste har det vore eit høgt tal trugsmål, sa Manji etter foredraget.

– Korleis kan du vite at dei kjem frå Skandinavia?

– Politiet har eit sporingssystem der dei ser kvar trugsmåla er sendt frå, men ikkje kven som har sendt dei.

Bestseljar

Manji vart verdskjend då ho gav ut boka «Hva er galt med islam?», som vart ein internasjonal bestseljar. Boka er oversett til arabisk, urdu og persisk, som kan lastast gratis ned frå heimesida hennar. Til no har det vore 200 000 nedlastingar, og ho får stadig tilbakemeldingar på at unge muslimar i Midtausten laster ned og spreier boka hennar mellom vener.

Når ho held foredrag på amerikanske univeristet, fortel ho at mange studentar kjem fram og kviskrar «takk» til henne etterpå.

– Eg spør kvifor dei kviskrar. Dei svarar at eg kan reise frå campusen om to timar. Det kan ikkje dei. Mange kvinner, ikkje alle, svarar: «Vi vil ikkje blir valdtekne fordi vi støttar synet ditt».

Open rekruttering

På mediedagane fortalde ho at rekruttering til terroristnettverka foregår ope.

– Dei som kommuniserer valdeleg islam, gjer det ope. På ei open samling på University of Toronto ved utbrotet av krigen i Irak, sa imamen på perfekt engelsk at «jihad ikkje begynner der borte, men at det begynner her. Viss du ikkje kan bidra med sønene dine eller deg sjølv, kan du i det minste bidra med pengane dine».

– Dette vart sagt i ei open samling på eit mykje trafikert tidspunkt. Det var ikkje naudsynt med kodeord eller eit hemmeleg samfunn.

Sjølv brukar ho internett til å leggje ut islam-reformvenlege tolkingar. Den mest populære tolkinga på nettsidene hennar no er spørsmålet om muslimar kan gifte seg med ikkje-muslimar.

LES MEIR OM IRSHAD MANJI I VÅRT LAND I MORGON.